turkmenatlary@online.tm

      Beýik Galkynyşlara we täze özgertmelere beslenýän Türkmenistan Döwletimiziň taryhyna öçmez sahypa bolup ýazylan, ýurdumyzyň XX Halk Maslahatynda döwletimizde oba hojalyk pudagyny düýpli özgertmek barada möhüm çözgütler kabul edildi. Türkmen obalaryny galkyndyrmak, olarda düýpli özgerişleri amala aşyrmak, ekerançylygy, maldarçylygy has-da ösdürmek, oba hojalyk önümleriniň bolçulygyny döretmek ugrunda täze döwür başlandy.

      Ýurdumyzyň oba hojalyk ulgamynyň ähli işgärleri bilen birlikde, «Türkmen atlary» döwlet birleşiginde atçylyk pudagyny ösdürmek babatynda hem giň möçberli işler durmuşa geçirilýär. Birleşikde ahalteke tohum atlarynyň dünýä ýüzündäki şöhratyny öňkiden-de mahabatlandyrmak, atçylykda seçgi-tohumçylyk işleriniň has-da gowulandyrylmagyny üpjün etmek, tohum atlaryň baş sanynyň artmagy bilen baglanşyklylykda, olaryň syn-sypatyny gowulandyrmagyň, bar bolan atlary şejere ugurlary boýunça köpeltmegiň dürli usullaryny kämilleşdirmek hem-de ahalteke atlarynyň täze ugurlaryny döretmek boýunça degerli çäreler işlenilip düzülýär.

«Türkmen atlary» döwlet birleşiginde ahalteke tohum atlarynyň dünýä ýüzündäki şöhratyny has-da mahabatlandyrmak maksady bilen türkmen atşynaslary halkara ýaryşlarynyň birnäçesine gatnaşyp baýrakly orunlara mynasyp bolup geldiler.

       2008-nji ýylyň maý aýynyň 17-18-i aralygynda Özbegistan respublikasynyň Medeniýet we sport işleri baradaky ministrliginiň hem-de Özbegistan respublikasynyň atçylyk sporty federasiýasynyň goldawyndaky jogapkärçiligi çäklendirilen “Ahalteke-şer” jemgyýetiniň çagyrmagy boýunça Daşkent şäherinde “Türkistanyň ýyldyzy” ady bilen geçirilen açyk çempionata «Türkmen atlary» döwlet birleşiginiň 14 adamdan ybarat ýygyndy topary we saýlanyp alynan 8 baş ahalteke atlary bilen gatnaşdylar.

Bu açyk çempionata gatnaşan türkmen atşynaslary mümkin bolan ýedi sany baýragyň altysyna mynasyp bolup ata watana uly ýeňiş bilen gaýdyp geldiler.

      «Türkmen atlary» döwlet birleşiginiň düzümine 7 sany kärhana girýär. Köpýyllyk seçgi-tohumçylyk meýilnamalaryny taýýarlamak birleşigiň atşynaslarynyň esasy wezipeleriniň biri bolup durýar.

Atlaryň baş sanyny köpeltmegiň esasy ösüşi, mal lukmaçylygy çäreleriniň dogry we dürs gurnalmagyny ýola goýmak, şeýle hem keseliň öňüni alyş çärelerini işläp düzmek bilen ene baýtallary höwür atlara saýlap jübütleşdirmek arkaly olaryň doly derejede ýygylmagyny gazanmak arkaly olardan alynýan sagdyn ýaş ösdürim taýlaryň baş sanyny artdyrmak, şeýle hem atlaryň idedilişini döwrüň talabyna laýyklykda öňkiden-de gowulandyrmagyň hasabyna göz öňünde tutulýar.

       Mundan hem başga halkara ölçeglerine laýyklykda tohum atlaryň döwlet tohumçylyk kitabynyň II tomy çapa taýýarlanyp neşir ediler, döwlet tohumçylyk kitabynyň III tomuny çapa taýýarlamaklyga girişiler. Şonuň bilen bir hatarda ýokary we ýörite bilim berýän mekdepleriň talyplary, okuwçylary üçin atçylyk boýunça okuw kitaplaryny, gollanmalary taýýarlamak işleri hem ünsden düşürilmez.

       Türkmenistanyň Prezidentiniň 2007-nji ýylyň sentýabr aýynyň 22-ne çykaran 9068 belgili Karary esasynda, Türkmenistanyň Merkezi döwlet aýlawynyň durkuny halkara derejesine gabat gelýän nusgada täzelemek, onuň töwereklerini abadanlaşdyrmak we ony 2008-nji ýylda doly derejede tabşyrmak maksady bilen düýpli gurluşyk işlerini ýerine ýetirmeklik üçin Döwlet serişdesiniň hasabyna 22804000 amerikan dollary meýilleşdirildi. Häzirki wagtda gurluşyk işleri doly depginlerde dowam etdirilýär, nesip bolsa 2008-nji ýylyň oktýabr aýynda Mukaddes Garaşsyzlygymyzyň şanly 17 ýyllyk baýramçylygynyň dabaralarynyň bellenilýän günlerinde durky täzelenen ajaýyp döwlet aýlawynyň doly derejede işläp başlamagyna garaşylýar.

        Hormatly Prezidentimiziň çuň manyly pähim-paýhasa ýugrulan, öňdengörüjilikli syýasatlaryndan ugur alyp täze galkynyşa beslenýän ata Watanymyzda kalby joşgunly türkmen atşynaslaryny buýsandyran 2008-nji ýylyň ýanwar aýynyň 31-ine kabul eden 9438 belgili taryhy Karary esasynda «Türkmen atlary» döwlet birleşiginiň merkezi edarasynyň döwrebap iş şertlerini döretmek maksady bilen ajaýyp binany sowgat bermegi türkmen atşynaslarynyň kalbyny joşa getirdi, ata-babalarymyzyň ençeme asyrlaryň dowamynda sünnäläp döreden nurana bedewlerine mundan beýläk-de yhlas etmek, olary saklamak we nesil ugurlary boýunça köpeltmek, baş sanyny artdyrmak ugrunda gije-gündiz gaýratly zähmet çekmäge bize uly ruhubelentlik we egsilmez güýç-kuwwat berdi.

        Bu ajaýyp binanyň içki durkyny döwrebap abatlaşdyrmak, türkmen atşynaslygynyň milli muzeýini döretmek işleri birleşigiň öz serişdeleriniň hasabyna ýerine ýetirmek bilen 2008-nji ýylyň oktýabr aýynda işe girizmeklik göz öňünde tutulýar.

       Döwletimiziň paýtagty gözel Aşgabadymyzda halkara ülňülerine laýyk gelýän döwlet aýlawynyň bolmagy türkmen atşynaslygynyň ösüp-örňemeginde, halkara derejeli atly sport ýaryşlaryny, at çapyşyklaryny gurnamakda, ýurdumyzda bellenip geçirilýän ähli milli baýramlarymyzyň has-da dabaralanmagynda bahasyna ýetip bolmajak ähmiýete eýe bolar. Ýurdumyzyň ilaty we diýarymyza dünýäniň dürli döwletlerinden gelýän myhmanlar bu ýerde behişdi türkmen bedewlerimiziň gözelligini ýakyndan synlap, egsilmez ruhy lezzet alarlar.

Hormatly Prezidentimiziň taýsyz tagallasy, atalyk aladalary we gönümel tabşyryklary esasynda eziz diýarymyzyň ähli welaýatlarynda halkara ülňilerine gabat gelýän döwrebap aýlawlary gurmak barada halkara bäsleşigini yglan etdi.

       Häzirki wagtda bu bäsleşige gatnaşmak maksady bilen ady belli gurluşyk kompaniýalarynyň we firmalarynyň otuzdan-da gowragy isleg bildirdiler. Munuň özi bolsa welaýatlarda bina boljak bu ajaýyp desgalaryň aňry başy derejede guruljakdygynyň aýdyň kepili bolup hyzmat edýär.

Geljekki ýakyn ýyllarda beýleki welaýatlarymyzda hem döwrebap täze aýlawlaryň gurulmagy behişdi bedewlerimiziň ösüp-örňemeginde, olaryň has-da kämilleşdirilmeginde bahasyna ýetip bolmajak ähmiýete eýe bolar.

"Türkmen atlary" döwlet birleşiginiň baş binasy