"Türkmen atlary"
döwlet birleşigi

Şu gün Arkadag şäherinde Türkmenistanyň Prezidentiniň Ahalteke atçylyk toplumynyň «Galkynyş» milli at üstündäki oýunlar toparynyň Monakonyň Monte-Karlo şäherinde geçirilen 47-nji halkara sirk sungaty festiwalynda halkara baýraklara, hususan-da, Altyn baýraga we beýleki ýörite baýraklara eýe bolmaklary mynasybetli dabaraly çäreler geçirildi. Bu dabaraly çärelere Türkmenistanyň Mejlisiniň Başlygy, Türkmenistanyň Ministrler Kabinetiniň Başlygynyň orunbasarlary, Ministrler Kabinetiniň ýanyndaky Ulag we kommunikasiýalar agentliginiň Baş direktory, harby we hukuk goraýjy edaralaryň ýolbaşçylary, Türkmenistanyň Halk Maslahatynyň Diwanynyň Iş dolandyryjysy, Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy, ministrlikleriň we pudaklaýyn dolandyryş edaralarynyň, jemgyýetçilik guramalarynyň ýolbaşçylary, welaýatlaryň, Aşgabat we Arkadag şäherleriniň häkimleri, ýokary okuw mekdepleriniň, köpçülikleýin habar beriş serişdeleriniň ýolbaşçylary, şeýle-de daşary ýurtlaryň we halkara guramalaryň Türkmenistanda ýerleşýän diplomatik wekilhanalarynyň ýolbaşçylarydyr wekilleri we beýleki köp sanly adamlar gatnaşdylar.

«Watan» habarlar gepleşiginde habar berlişi ýaly, dabaraly çäreler Arkadag şäherindäki «Akhan» binasynyň ýanynda başlandy. Ilki bilen, «Galkynyş» milli at üstündäki oýunlar toparynyň agzalary, köp sanly dabara gatnaşyjylar Arkadag şäheriniň «Akhan» binasynda ýurduň medeniýet we sungat işgärleriniň aýdym-sazly çykyşlaryna tomaşa etdiler hem-de bu ýerden Türkmenistanyň Goranmak ministrliginiň atly topary bilen bilelikde atly ýörişli Arkadag şäheriniň Görogly adyndaky döwlet atçylyk sirkine tarap ugradylar.

Türkmenistanyň Goranmak ministrliginiň atly toparynyň iki sany atly serkerdesi ellerinde Türkmenistanyň Döwlet baýdagy we Birleşen Milletler Guramasynyň baýdagy bilen atly ýörişiň öňüni çekdiler. «Galkynyş» milli at üstündäki oýunlar toparynyň agzalary bedewleriň üstünde hem-de ýörite paýtunda halkara ýaryşda mynasyp bolan baýraklaryny ellerinde alyp bardylar. Olar şäheriň Akhan we Aba Annaýew şaýollarynyň ugry bilen Arkadag şäheriniň Görogly adyndaky döwlet atçylyk sirkine tarap baryşlaryna ýol ugrunda elleri baýdakly, gülli Arkadag şäheriniň ýaşaýjylary, edara-kärhanalaryň işgärleri, talyp ýaşlar toparyň agzalaryny dabaraly garşyladylar, şeýle-de ýörite bellenen ýerlerde döredijilik toparlary aýdym-sazly çykyşlary ýerine ýetirdiler.

«Galkynyş» milli at üstündäki oýunlar toparynyň agzalaryna Arkadag şäheriniň Görogly adyndaky döwlet atçylyk sirkiniň öňündäki meýdançada duz-çörek hödür edildi we il sylagly ýaşulular, halypa atşynaslar olary garşy alyp, gazanan uly üstünlikleri bilen gutladylar. Toparyň agzalary hem-de dabara gatnaşyjylar bu ýerde medeniýet we sungat işgärleriniň aýdym-sazly çykyşlaryna tomaşa etdiler.